Bago Aplaya

Macario D. Tiu

Hinay ang tapya sa balod
ug nagsugod na ang taob.
Namasbas ang pari sa bangkang de motor,
ug lakip tang nawiskan sa bendita
uban sa mga gagmayng mananagat nga nanag-alirong.
Nalipay ako sa ilang kalipay
nga nakaangkog himan sa panagat.
Mao kana ang atong gisaulog.
Apan hinay ang tapya sa balod
ug nagsugod na ang taob.
Ug sama sa karaang magbabalak,
akong nabati ang walay kataposang kasubo
nga dala sa balod.
Apan dili tungod sa pangagho sa katawhan
kondili sa akong kaugalingong kahimtang.
Ugma, mobiya ka na sa hangtod
Samtang hinay ang tapya sa balod
Ug magsugod na ang taob.